منتديات دير بعلبة
أهلاً بك عزيزي الزائر ... إذا كنت عضواً جديداً فنتشرف بتسجيلك في منتديات دير بعلبة أما اذا كنت عضواً في المنتدى فأهلا بعودتك ... مدير المنتدى .



 
الرئيسيةمكتبة الصورس .و .جالمجموعاتالتسجيلدخول
 عزيزي الزائر :  نتشرف بانضمامك إلى أسرة منتديات دير بعلبة والمشاركة و التفاعل في كافة المواضيع ، إذا رغبت في ذلك ، فأنا لا أدعوك للتسجيل فقط بل أدعوك للتواصل و الإبداع معنا ، آملين أن تقضي برفقتنا أطيب الأوقات ... اضغط هنا للتسجيل .                                   

إدارة منتديات دير بعلبة تتقدم بطلب مشرفين أقسام للمنتدى ... اضغط هنا لمشاهدة التفاصيل .


شاطر | 
 

 الأمثال في حي دير بعلبة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
أبو عيدو
 
 
avatar

عدد المساهمات : 47
النقاط : 123
الشُّهرة : 1
تاريخ التسجيل : 13/02/2011
العمر : 29
المكان : سوريا
الجنس : ذكر

مُساهمةموضوع: الأمثال في حي دير بعلبة    الخميس 17 فبراير 2011, 11:00 am

االأمثال مرتبة حسب الأحرف الأبجدية
الحرف أ

- أب ربى ولد وألف ولد ما ربوا أب
- إبريق ما بيطفي حريق
- ابن الابن ابن الحبيب وابن البنت ابن الغريب
- ابن الأربعة ربعوه وان ما قعد اضربوه وبنت السته ستتوها وان ما قعدت لا تغصبوها
- ابن آدم ما بيشبعو غير التراب
- ابن يومين ما بيعيش تلاته
- ابن ليلة بيفهم بالشيلة
- ابنك على ما ربيتيه وجوزك على ما عودتيه
- ابن الحلال عند ذكره بيبان
- الآخره يا فاخره
- الأرض الواطيه بتشرب ميتها ومية غيرها
- الأسى ما بينتسى
- الأعمار بيد الله
- الحق الكذاب لورا الباب
- ابعد عن الشر وغنيله
- إذا كان أبوها راضي وانا راضي شو دخل القاضي
- اتفاق بالحقل ولا قتال ع البيدر
- اتعب نفسك ولا تتعب لسانك
- إجا الفزع طير الوجع
- إجى العصفور يتعلم مشية الزرزور صار يمشي نطوطة
- إجا المنتوف لعند المهتري قلو عندك دوا للعافية؟
- إجا طئت الضهر
- إجا للعميان صبي مفتح قلعولو عينيه بالتلميس
- إجا يكحلها عماها
- إجت حفر وتنزيل
- إجت والله جابها
- إجو بيت السلطان يحدو خيلهم رفعت الخنفسة رجلها
- احترنا منين بدنا نمشطك يا أقرع
- أحر من الجمر
- أحمض ما عنك اطبخ
- احفظ عتيقك جديدك ما بينفعك
- اختلط الحابل بالنابل
- أخدو على حين غره
- آخر الزمر طيط
- آخر طبة الكيل
- آخرة المعروف الضرب بالكفوف
- إخرى تبرى
- أخوت شلف شلفة احتار فيها ألف عاقل
- أخدنا من هالحزمة عود والباقي تاخدو القرود
- إجتنا بالقميص اللي عليها
- أخرس وعامل قاضي
- أخي وصاحبي بس صوب الكيس لا تقرب
- أخطب لبنتك قبل ما تخطب لابنك
- أدلي إدي
- ادن من طين وادن من عجين
- إذا الحيط شق بالطول عمر فوقه قصور وإذا شق بالعرض نزله للأرض
- إذا إنت العدل أنا رباطو
- إذا أإطعمت أشبع وإذا ضربت أوجع
- إذا بتوعدو بكفن بيصبح ميت
- إذا بدك تحممو لا ترد بتمو
- اذا بدك تحيرو خيرو
- اذا بدك تعيش بأمان لا تسمع للنسوان
- إذا بدك مرتك تموت وقدها حطب التوت
- إذا بليتم بالمعاصي فاستتروا
- إذا بموسك بدنا نحلق دقنا خليها توصل لركبتنا
- إذا تقاتلو الحرامية بينت السرقة
- إذا شفت العريان لا تسألو وين تيابك
- إذا ضربت اضرب امير وإذا سرقت اسرق حرير وإذا عاشرت عاشر وزير فإذا عيروك بتستاهل التعيير
- إذا عملت خير كملو
- اللي ما عاجبو ينتف (شاربو) حاجبو
- إذا انتلت الخواصر ارتخت المفاصل
- إذا أرت ان تطاع فاسأل المستطاع
- إذا حل القدر عمي البصر
- إذا جن ربعك عقلك ما بينفعك
- إذا اجت الملايكة بتهرب الشياطين
- إذا حلق جارك بل دقنك
- إذا كان الرجال فحمي بالبيت رحمي
- إذا كان الكلام فضة فالسكوت من ذهب
- إذا كان طباخنا جعيفص يا طول ماشبعنا مرقة
- إذا كبر إبنك خاويه
- إذا كرهك جارك دير باب دارك
- إذا كنتم إخوة تقاسمو بالحق
- إذا ما بدك تجوز بنتك غلي نقا
- إذا ما وسعتكم الدور بتساعكم الصدور
- إذا بدك تستريح شو ما شفت قول مليح
- إذا نقصت الشياطين بيخف على الملايكة
- إذكر القط بيجيك ينط
- إذكر الديب وهير القضيب
- إربط الحمار مكان ما يقلك صاحبو
- أرخص من الفجل
- اسأل مجرب ولا تسأل حكيم
- استرو ما شفتوا منا
- استكبرها ولو كانت مرة
- أسرع من البرق
- اسعى يا عبدي لإسعى معك
- اشتهينا جاجة أكلناها بريشها
- أشهر من نار على علم
- اصرف ما في الجيب يأتيك ما في الغيب
- أصابيعك ما كلن سوا
- أصبحنا على ما أمسينا
- أصبحنا وأصبح الملك لله
- اضرب الأعمى ودبو مانك أكرم من ربو
- اضرب الحديد وهوي حامي
- اضرب المربوط بيخاف الفلتان
- اضرب العجينة بالحيط الما لزقت بتعلم
- اظهر وبان عليك الأمان
- اعطيني ضهر لفرجيك النجوم بعز الضهر
- أعط الأجير إجرته قبل أن يجف عرقه
- اعقل وتوكل
- اعمل العليك والباقي على الله
- اعذر من أنذر
- أعزب دهر ولا أرمل شهر
- اعطي خبزك للخباز ولو أكل نصو
- أعمى قال للأطرش خلينا نشوفك
- اعمل خير شر تلقى
- اعمل منيح وزت بالبحر
- اقعد أعوج واحكي جالس
- اقعد برا ولا تقعد جنب الجرة
- اقعد بعيد واحكي شو ما بتريد
- اقلع شوكك بايدك
- أقرع سحب سحبة طلعلو مشط
- أقرع ودقنو طويلة قال شي بيغطي على شي
- اقلع الضرس ووجعو
- آكل شارب من الهم هارب
- أكلتو تمري وعصيتو أمري
- أكل حتى لوا وقال الطبيخ ما استوى
- أكل واتملى وقال الطبيخ ما مقلى
- أكلني لحم ورماني عضم
- أكبر منك بيوم أعرف منك دوم
- أكتر من الهم ع القلب
- أكل الرجال ع قد فعالها
- أكل ومرعى وقلة صنعه
- أكله وانحسبت عليك كول وبحلق عينيك
- أكلت حلوا وشربت ماء كأني لا أكلت ولا شربت
- إكرام الضيف واجب
- إكرام الميت دفنه
- الإنسان عقلو مو دفتر
- الإنسان لولا الظنة كان دخل الجنة
- الإنسان ما بيتعلم غير من كيسو
- الآخرة يا فاخرة
- الأعرج بين المكرسحين ملك
- الأعمال بالنيات
- الأقارب عقارب
- الأكل حشو مصران
- الأكل على قد المحبة
- الأكل ما إلك بطنك ما إلك
- الأوان ما بيستحي من أوانه
- الحق البوم بيدلك ع الخراب
- الف ام تبكي ولا امي تبكي
- ألف غلبة ولا قلبة
- ألف مبخر ما بيلحق على فسى
- إلك صاحب إلك ألف عدو
- إلو تم ياكل ما لو تم يحكي
- إلو تلتين الخاطر
- إلو طني ورني
- إلو من الجمل إدنو
- أمل إبليس بالجنة
- أم لسان غلبت كل النسوان
- أم واحد الله حيرا وإم عشا الله دبرا
- إمي ما بتقدر غير على أبي
- أمين وخاين مابيصير
- امسك الحبل بيوصلك للود
- امشي بجنازة ولا تمشي بجازة
- آمن بالحجر تبرا
- أنا ،أعوذ بالله من كلمة أنا
- أنا وأخي على إبن عمي وأنا وإبن عمي ع الغريب
- أنا وين وهوي وين
- إن دبلت الوردة بتبقى ريحتها فيها
- إن شاء الله بتشوفو على وشها الخير
- إن طلع سنو خبو الخبز عنو
- أنا قلتلك تقبرني موتحفر وتطمرني
- إن كان جارك بخير إنت بخير
- إن كنت غشيم دفاع نص التمن
- إنت أمها وأبوها
- انفشو وشوف ما أجحشو
- انفع صديقك بشي ما يضرك
- ان كنت ع البير لا تصرف مي كتير
- إن أزهر فولك سافر وخليه وإن أزهر خيارك نصوب خيامك فيه
- إن أقبلت باض الحمام ع الوتد وإن أمحلت بال الحمار ع الولد
- إن جاعت البطن بإيش ما كان قوتها وساعت البسط عمرك ما تفوتها
- إن حضر الماء بطل التيمم
- إن دخلت بيت العوران إعور عينك
- إن دري جوزك بغيبتك كملي يومك وليلتك
- إن ردت تبهدل رجال سلط عليه مرا وان ردت تبهدل مرا سلط عليها ولد
- إن ردت سرك ينفضح سلمو لمرا
- إن ركضت ركض الوحوش غير رزقك ما تحوش
- إن فاتت باتت
- إن كان بالدين حط رطلين
- إن كان حبيبك عسل لا تلحسو كلو
- إن كانت المرجلة بالشوارب كان الجردون أكبر رجال
- أهل إدلب ماؤهم جمع وكذبهم نبع
- أهل المتل ما خلو شي ما قالوه
- أهل الغنطو بياخدو ما ينطو
- أهل أول ما خلو شي ما قالوه
- أهل مكة أدرى بشعابها
- أول الرقص حنجلة
- أول الغيث قطرة
- أوهى من بيت العنكبوت
- أول الحب نظرة
- إيد الحر ميزان
- إيد وحدة ما بتصفق
- إيدك وما تطول
- إيدي بزنارك
- إيمت كنا والبرد يرقعنا


الحرف ب

- بأيام ضيقك بتعرف عدوك من صديقك
- باب الي بيجيك منو الريح سدو واستريح
- باب النجار مخلوع
- باب شقاع وباب رقاع
- الباب يفوت جمل
- باع اللي فوقه وتحته
- بالإعاده إفاده
- بالدور مو بالزور
- بالسخرة متل المهرة
- بالسوق شحرور وبالبيت دبور
- بالصبر وطولة البال إبن آدم بيزيح جبال
- بالع المس ع الحدين
- بالمال ولا بالعيال
- بالوجه مرايي وبالقفا مدراية
- بايعها وقابض حقها سلف
- بتقول للشر اجتر
- ببلعو ابرة بخراه مسلة
- بتبين دنبها وبتخبي راسها
- بتجي ع أهون سبب
- بتحبل برا وبتولد عندي
- بتحاكيه بالشرق بيجاوبك بالغرب
- بتشوفني بعين بشوفك بتنتين
- بتقللو تور بيقلك حلبو
- بتلين يا آغا بتلين
- بنتي بطبريا وهمها واصلي
- بحاكيكي يا جاره سمعي يا كني
- بيحب يعلى ولو ع الخازوق
- بحبك يا سواري لإنو زندي فيك
- بحر ما بيتعكر من نهر
- بحصة بتسند جرة
- بحياتو طه ما سواها
- بيخاف يخرا مشان ما يجوع
- بداريه متل العين الرمدانة
- بدك تطول بالك
- بدك تعرف عمرو فتاح تمو
- بدك تعز الحماية شتريلها صرماية
- بدك عنب ولا قتل الناطور ؟
- بدل ما تقلها كشي كسير رجلها
- بدل ما قول للعبد يا سيدي بقضي حاجتي بإيدي
- بدلو غزلانن بقرود
- بدنا سلتنا بلا عنب
- بدنا نصلي ع الحاضر
- بدو فت خبز
- بدو خرزة زرقا
- بدو قط من خشب يصيد ما ياكل
- بدو يعزي وما بيعرف مين مات
- بكرا بيدوب التلج وبيبان المرج
- براسو موال بدو يغنيه
- برطيل بيحل دكة القاضي
- البرغل بسامير الركب
- بس تشيل ايدك من تمو بيبطل يعرفك
- بس وقعت الدبه بيكترو سكاكينا
- بس شم تحت باطو بلش يرفس
- بساط أحمدي
- بشر الزاني بالفقر والقاتل بالقتل ولو بعد حين
- بيشل الهم عن القلب
- بصلتو محروقة
- بطالع الزير من البير
- بطالع الشعرة من العجين
- بطن النسوان بستان
- بطيخ يكسر بعضو
- بعد العرس مفي قرص
- بعد الكبرا جبة حمرا
- بعد ما شاب ودوه الكتاب
- بعد ماحبلت وطنبرت قامت تحمرت وتبودرت
- بعيد عن العين بعيد عن القلب
- البغض بالأهل والحسد بالجيران
- بيفوت قاضي بيطلع وزير
- بقلد الأكابر بشحط الصرامي
- البقره لما بتوقع بتكتر سكاكينا
- بكرا بتقاقي ما بتلاقي
- بكل عرس إلو قرص
- بيكون بالطب بيصير بالبيطرة
- بكي إبنك أحسن ماتبكي عليه
- البكي فوق راس الميت
- بلط البحر
- بلغ السيل الزبى
- البنت سر أمها
- البهدلة متل الزكاة ما بياكلها غير اللي بيستحقها
- بوس الأيادي ضحك ع الدقون
- بياخدك ع البحر وبيرجعك عطشان
- بياكل راس الحية
- بيت الضيق بيساع ألف صديق
- بيت السبع ما بيخلى من العضام
- بيت العنكبوت كتير ع البيموت
- بيت اللي رباها ما هرب وخلاها
- بيت دقلو بيرقص
- بيت سياح نياح
- بيتعلم البيطرة بجحاش النور
- بيتو بالكري وخبزو بالشري
- بيتي أستر لعورتي
- بيحسد الميت ع كفنو
- بيحلب النملة
- بيخاف من خيالو
- بيخطف الكباية من راس الماعون
- بيخلط شعبان برمضان
- بيخلط عباس بدرباس
- بير الي بتشرب منو ابعد الأذى عنو
- بير ما إلو قرار
- بيسأل عن البيضة مين باضها وعن الجاجة مين جابها
- بيساوي للدب أدنين
- بيسرق الكحلة من العين
- بيسمع ضراط النملة
- بيسوى تقلو دهب
- بيض ما بينقلي بضراط
- بيضة ما بتكسر حجر
- بيضرط من طيز وسيعه
- بيع الحمار أحسن ما تضل تشوفو
- بيعرف البير وغطاه
- بيعرف وبيحرف
- بيعمل السبعه وذمتها
- بيعمل العمله وبيتغطى بالشمله
- بيعمل ع الحبة قبة وع الزبيبة معصرة
- بيفهمها وهيي طايرة
- بيقتل القتيل وبيمشي بجنازتو
- بيكون عم يحلق بيشلع ضراس
- بيلعب ع الحبلين
- بيلهي الحمار عن عليقو
- بيمشي بالمقلوب متل الساطعون
- بين الأهل ما في كلفة
- بين البقر والجواميس راحت الضفادع معيس
- بين الطلقة والطلقة بتتغير الخلقة
- بين حانا ومانا ضيعنا لحانا
- بين حقك وعيفو
- بينشرب مع المية العكرا
- بينفخ النفخة بتشعل بيدر حنطة
-


الحرف ت
- التاجر المفلس بيدور بدفاترو العتيقة
- تاجر ومنجم ما بيصير
- تاجر بالكفان ما حدى مات
- التاريخ بيعيد نفسه
- التالته ثابته
- تباعدو تحاببو تقاربو تباغضو
- تبن ما إلك تبان ما إلك
- تباهت القرعه بشعر جارتها
- التبن إذا عتق ما بيصير تبر
- تتمسكن لحد ما تتمكن
- تحرم عليي متل ما حرمت مكة ع الكفار
- تحرم عليي متل ما حرمت عليك بنتك
- تخانقت الجواميس راحت الصيصان معيس
- تدبل الوردة وتبقى ريحتها فيها
- التدبير من التفكير
- ترك الجمل بما حمل
- ترك الشقا على من بقى
- تسابقوا الحمير من حض الركيبة
- تسلى شوي بهل مقصقص حتى يجي الطيار
- تعبنا وشقينا وشي ما لقينا
- تروق وتعوق وتغدا وتمدا وتعشى وتمشا
- تقول فص ملح وداب
- التكرار بيعلم الحمار
- توتي توتي خلصت الحوتي
- تي تي تي تي متل ما رحتي متل ما جيتي



الحرف ث
- ثقيل متل لكن الوقف
- الثلجة الأولى سم والتانية دم والتالتة كول ولا تهتم
- ثوب العيرة ما يدفي وإن دفى ما يدوم
- ثور أعمى وتبن ناعم
الحرف ج
- الجاجة بتشرب وبتطلع لربها
- الجاجة قطعوا منقارها ما بطلت كارها
- الجار قبل الدار
- الجار ولو جار
- جارك القريب أحسن من أخوك البعيد
- جارك قدامك ووراك الماشاف وجهك بيشوف قفاك
- جازه وجوزتك حظ منين بدي جبلك
- الجازة قسمة ونصيب
- جاي يا قاتل يا مقتول
- جبانة ما بترد ميت
- جبتك يا عبد المعين لتعين لقيتك يا عبد المعين تنعان
- الجبس خود بأوله الأخف وبآخره الأوزن
- جبل مع جبل ما بيلتقي ،إبن آدم مع إبن آدم بيلتقو
- جبناك يا أقرع لتونسنا كشفت عن قرعت وفزعتنا
- جحي أكبر من أبوه
- جحي أولى بلحم تورو
- جحي جاب وجحي أكل
- جحي لو يعمر كان عمر ديار إهلو
- جدي لعب بعقل تيس
- الجديد إلو رهجة
- جرة وانكسرت
- جرح الأسى ما بينتسى
- جرح البدن بيطيب مع الزمن وجرح الروح بيروح للكفن
- جريي دم ولا تجري عادة
- جوابو تحت لسانو
- جكارة بالطهارة عملها بتابو
- جلدة قفاه على وجهو
- جلدو متمسح
- الجمل بمصرية ومصرية مافي
- الجمل لو شاف حردبتو لوقع وانكسرت رقبته
- جنازة حافلة والميت كلب
- جنب العقرب لا تقرب وجنب الحية فروش ونام
- الجنة بلا ناس ما بتنداس
- الجنون فنون
- الجازة قسمة ونصيب
- جازة قبرص
- جازة نصرانية
- جود من الموجود
- جوز الضراير حاير
- جوزنا بنتنا لنرتاح من بلاها رجعت وتماني وراها
- الجوع كافر
- جوع كلبك بيلحقك


الحرف ح
- حامل السلم بالعرض
- حاطط دمو على كفو
- حط ع الجرح ملح
- حطينا بالقفة طلع ع دانيها
- الحب أعمى
- الحاجة أم الإختراع
- حاجي تطق حنك
- حارتنا ضيقا ومنعرف بعضنا
- الحاصود بيحصد بقرن عنزة
- حاطة الحزن بالجرن
- حبر على ورق
- الحبس للرجال
- حبل الكذب قصير
- الحبل ع الجرار
- الحبل مع الطولة بيقطع خرزة البير
- حبيبك حبو ولو كان عبد أسود
- حتى تستريح كل شي قول منيح
- حجتين بحاجة
- الحجر الما بيعجبك بيفجك
- الحجر بمطرحو قنطار
- الحذر ما بيمنع القدر
- الحر قلبو دليلوالحرامي ايدو بتاكلو
- حساب السوق ما بيطبق على حساب الصندوق
- حساب القرايا ما بيطبق على حساب السرايا
- الحساب صابون القلوب
- حسب نواياكم ترزقون
- حسدوا الأعمى على كبر عيونو
- الحسن أخو الحسين
- الحسود لا يسود
- حط اصبعتك بعينك متل ما بتوجعك بتوجع غيرك
- حط البطال وحطلو بيت مال
- حط القردة بالجرة بيطلع قفاها لبرة
- حط القدر ونفوخ تحتو ما أضرب من الخال غير ابن أختو
- حط إيديك وإجريك بمي بارده
- حط بالخرج
- حظ بيفلق الصخر
- حط حطامو
- حط راسك بين الروس وقول يا قطاع الروس
- حط ع الجرح ملح واسكوت
- حطو بخانة اليك
- حطو وسب إهلو بتعرف جنونو من عقلو
- حظ اعطونا وبالبحر رمونا
- حظك يا ابو الحظوظ
- حظو بكل شي أسود إلا بالبطيخ أبيض
- الحق ما حدا بيزعل منو
- الحكاية فيها إنا
- حكلي لحكلك
- حكم فينا حكم فرعون
- الحكي أخد وعطا
- حكى بدري وانشرح صدري
- حلال ع الشاطر
- حلس ملس متل صوف الكلاب
- الحلو لو يتبغدد ما يهمو حد والبشع لو يتبغدد ضربة تهدو هد
- الحلوة حلوة دوم ولو قامت من النوم
- حمار شغل
- حمار ضرط نار قام ما احترق دنبه ،قالو سماع وسطر
- حمص ام الفقير
- الحمص اولو منافع واخره مدافع
- الحمصي لاتراضيه بيرضى لحالو
- حمل سم ولا درهم هم
- حمد ما ينام وفوق راسو حلاوة
- الحموي بلا نقاصة متل الجحش بلا حياصة
- الحموية خود منهم ولا تعطيهم
- حنطة ما الك لا تتوقف عند كيلها بتغبر دقنك وبتتعب بشيلها
- الحي أبقى من الميت
- الحي لا بد ما يلاقي حي
- الحياة لقمة مغمسة بالدم
- الحية إذا جاعت بتعض بطنها
- الحية ما بتنحط بالعب
- الحية ما بيبرد خلقعها حتى تنفض سمها
- حيتين بوكر واحد ما بيعيشو
- الحيط الواطي بتركبو كل الناس
- الحيط الواطي بنط عليه الكلب
- الحيطان دفاتر المجانين
- الحيطان لها آدان
- حيف ع اللحمة يا فول
الحرف خ
- خاف من الجوعان إذا شبع
- الخالة مرت الاب لا بتحب ولا بتنحب
- خالف تعرف
- الخان ضيق والحمار رفاس
- الخبايا لقايا والجازات حظوظ
- الخبر السيء بيوصل بسرعه
- خبز الحاف بيعرض الكتاف
- خبز الرجال ع الرجال دين
- خبي قرشك الأبيض ليومك الأسود
- خدو البنات من صدور العمات
- خدو الحكمة من أفواه المجانين
- خدوم الصنعا بتخدمك
- خبي العكازي ليوم العازي
- خسا الديب(جواب :إلك ولا للديب)
- خم نوم
- خلي الطابق مستور
- خباص ما بيخلي حدا من شرو
- خط الأعوج من تور الكبير
- خلط عباس على درباس
- خلي العسل بجرارو لتجي أسعارو
- خلي للصلح مطرح
- خليها بالصدر تدبح ولا تطلع لبرا وتفضح
- خمسة سته بخدمتها وهي بتنشق مخطتها
- خمسين مبخر ما بيغطو على فسى
- خود الأصيلة ولو كانت ع الحصيرة
- خود سرارهم من صغارهم
- خود شامية بتعيش عيشة هنية
- خود من التل بيختل
- خود من عبدالله واتكل على الله
- خود واعط
- الخوف بيقطع الجوف
- الخويف بيشوف عدوه بمنامه
- خير الاصحاب من دلك ع الصواب
- خير الأمور أوسطها
- خير البر عاجله
- خير جليس في الأنام كتاب
- خير الكلام ما قل ودل
- الخير اللي ما بيتاكل منه الله ما ببارك فيه
- الخير بعم
- خير تعمل شر تلقى
- الخير لقدام
- خيرا بغيرا
- خيط بغير هالمسلة
-



الحرف د
- داء فالج لا تعالج
- داء الموت ما بيعدي
- دابحنا البرد ومنضرط لحف
- داخل عليك
- الدار دار أبونا والناس بيقلعونا
- الدار دارنا والقمر جارنا
- دارة الدورة عليك يا عورة
- دب حرد عن كرم وفر قنطار عنب
- دب طلطميس ما بيعرف الجمعه من الخميس
- دبساتو مراق
- الدبور ما بيعطي عسل
- دخان يعمي ولا برد يقتل
- دخانك عمانا وأكلك ما جانا
- دخل الحابل بالنابل
- دخول الحمام ما متل طلوعو
- الدراهم كالمراهم حطها ع الجرح يبرا
- درب السد ما رد
- درب الكلب عالطاحون
- درب القط ع القصاب
- درهم ناموس ولا قنطار فلوس
- درهم وقاية خير من قنطار علاج
- الدروة أحسن من الفروة
- الدفا عفا والبرد قاتول
- دق الحديد وهوي حامي
- دق المي وهي مي
- الدكان بدها إجر مكسورة
- الدم ما بيصير مي
- دن دن يا دنو كل مين بياخد من سنو
- الدناوة طبع
- دنب الكلب أعوج ولو انحط بالقالب أربعين سنة
- الدنيا إن خليت خربت
- الدنيا بلا شراب خراب
- الدنيا دولاب وداير
- الدنيا دين ووفا
- الدنيا من عسر ويسر
- الدهب ما بتعرفو الا بعد ما بتحكو
- الدهر دولاب يوم الك ويوم عليك
- الدهر متل الجزرة يوم بتمك ويوم بصرمك
- دوام الحال من المحال
- دود الخل منو وفيه
- دور ع الأصل وخود بنته ولو كانت ع الجنبين بتميل
- الديك الفصيح من البيضة بيصيح
- الدين لله والوطن للجميع
- الدين ممنوع والعتب مرفوع والرزق على الله
- الدين غضب والدين
- الدين هم بالليل وذل بالنهار
- دينتو فرفش تركتو طنش طالبتو خرمش
- ديونو عم تزرب منو زرب
الحرف ذ
- الذكا من الله
- ذكرنا القط إجا ينط
- ذل فلوسك ولا تذل نفوسك
- ذل مالك ذل مالك
- ذنبك ع جنبك
- الذوق فضلوه على العلم

الحرف ر
- راح الغالي لا اسفي ع الرخيص
- راح المبقوط لعند المهتري قلو عندك دوا للعافية
- راح بحال سبيله
- راح تعبو متل تعب فضول
- راح بنص عمرو
- راح وهادا وجه الضيف
- راح يحج جاور
- راحت الخميرة والفطيرة
- راحت السكرة واجت الفكرة
- راحت تاخد بتار ابوها رجعت حبلي
- الراس اللي ما فيه نخوة قطعه حلال
- راعي الجمال ما بيعرف ربه غير وقت الزلق
- رافق الأجاويد بتكسب منهم وبتزيد
- رافق الأندال تطلع لا مكسب ولا مال
- رافق الجربان بتجرب متلو ورافق المبتلي بيعديك
- راكب جمل وحامل علم وقايل يا رب السترة
- ربك وحاكمك
- ربوا وتعبو
- ربي كما خلقتني
- ربيته كل شبر بندر
- ربيتو جرو لما صار كلب عضني
- الرجال بشهوة والمرا بسبع شهوات
- الرجال بالنهار عتال وبالليل زبال
- الرجال بيعشق من عينه والمرا بتعشق من ادنها
- الرجال جنا والمرا بنا
- الرجال رحمة ولو كان فحمة
- الرجال غايبه والنسوان سايبه
- الرجال عند أغراضها نسوان
- رجع ايد من ورا وايد من قدام
- رجعت المي لمجاريها
- رجعت حليمه لعادتها القديمة
- رجلي على رجلك
- الرجل بتدب مطرح ما بتحب
- رجلي ورجلك بالفلق
- الرجوع عن الخطأ فضيلة
- الرحمة بتجوز ع الميت والطيب
- رخيص وكويس وابن ناس
- الرز بحليب كل مابرد بيطيب
- الرزق الداشر بيعلم الناس ع الحرام
- رزق الناس ع الناس والكل ع الله
- رزق الكلاب ع المجانين
- الرزق مقسوم
- الرشحه أولها فروش ونام وآخرتا روح ع الحمام
- رضا الأب من رضا الرب
- راضي بالقلة والنياحه
- رضينا بالبين والبين ما رضي بينا
- الرفيق قبل الطريق
- ركبناه ورانا حط ايدو بالخرج
- رمانتين بفد ايد ما بينحملو
- الرمد أشوى من العمى
- الرمل ما بينعجن والشوك ما بينداس والسر ما بينحكى إلا لناس وناس
- رميناه بالبحر طلعت بتمو سمكه
- روح اشتكي السرايا الها اربع بواب
- روح بلط البحر
- الروح حلوة
- روح خريها
- روحة بلا رجعه
- الرايب ما بيرجع حليب
- ريد الخير لجارك بتلاقيه بدارك


الحرف ز
- زاد الطين بله
- زاد بالطنبور نغما
- زاد واحد بيكفي اتنين
- الزايد أخو الناقص
- زبال وبإيدو وردة
- الزحمة رحمة
- زمان اول تحول
- الزمن خوان
- زندها بيصير لها مرايه
- الزوج آخر من يعلم
- زوج الفقير للفقيرة بيكترو الشحادين
- زيادة الخير خير
- زيارة المجانين بكوانين
- زيوان بلدك ولا قمح الغريب
الحرف س
- السؤال ما حرم
- ساعة نحس
- سارحة المي من تحته ومو حاسس
- ساعة البسط لا تفوتها
- ساعة لقلبك وساعه لربك
- سرسوقة ماشية ولا نهر مقطوع
- سبحان اللي بيغير وما بيتغير
- سبحان مغير الأحوال
- سترة البنت جازتها
- سري مري
- سقوط الجوهرة ع الأرض ما بيقلل من قيمتها
- السكافي حافي والحايك عريان
- سكبة الجار ما بتشبع
- سكة عطل
- السكوت علامة الرضا
- الساكت عن الحق شيطان أخرس
- سكين ما بتقطع اللبن
- السلاح بإيد الخرا بيجرح
- سماع وسطر
- سمعان مو هون
- سمك بالمي ما بينشرا
- سموك مسحر خلص رمضان
- سموه حج أحمد صدق
- السنة ورا الباب
- سوس القمح منو وفيه
- السياره والمرا ما بينعارو
- سيكارة فلاح من كيس بدوي
- سرير الدهب ما بيبعدك عن المنامات الموحشة


الحرف ش
- شاب وما تاب
- شابت لحانا ولسا العقل ما جانا
- الشام ببناتها وحمص بمياتها وحلب بأكلاتها
- الشام زينه بس المستراح فيها غالي
- شاور اكبر منك واصغر منك وارجع لشورك
- شايب وعايب
- شب واستحلى
- شباب آخر زمن
- الشحاد إلو نص الدنيا
- شحاد ومشارط
- شخاخ وبينام بالنص
- شدة وبتزول
- شده بتشد ورخيها بترخي
- شرارة بتحرق حارة
- شرط اللي بالحقل ولا قتال ع البيدر
- الشرف ما بينباع ولا بينشرى
- شروال مالو دكته بأربعطعش
- شريك الوسخ خسار وخسرو
- شعرة من دنب الخنزير مكسب
- شغل هات ايدك والحقني
- شغلتو خفيفة نضيفة
- شفناك فوق وشفناك تحت
- شقوف الخرىما بتتكسر
- شم ولا تدوق وتبت لا توقع
- الشمس ما بتتغطى بغربال
- شمع الخيط
- شممو الحمار ورده قام أكلها
- الشهر الما بيجيك منو الجامكية لا تعدو ولا تعد إيامو
- شو إنت بالحارة يا منخل بلا طارة ؟
- شو لم الشامي ع المغربي
- شو جاب الطز للمرحبا
- شو جاب لجاب
- شي أكرك عجم
- الشي باين متل عين الشمس
- شي بيحط العقل بالكف
- الشي بدو حقو
- شي برنجي
- شي بروس وشي بلا روس
- شي بيشهي
- شي بيغطي على شي
- شي بيقرف
- شي بيكب وبيعمي
- شي بيهوي
- شي مضى وراح
- الشيب ما هو عيب
- الشيطان ما مات
- شيلني لشيلك


الحرف ص
- صاحب الحق سلطان
- صاحب المال تعبان
- صار اللي صار
- صار فص ملح وداب
- صار فوق الريح
- صار للخرا مرا وصار يحلف بالطلاق
- صار للدبانة دكانة وصارت تسكر ع بكير
- صار لو راس وبرناس
- صار متل القملة المفروكة
- صافي يا لبن
- صام صام وفطر ع بصلة
- صامد حالو متل صرماية العيد
- صايرلك تخت وبخت شو على بالك
- صبح القوم ولا تماسيهم
- الصباح رباح
- الصبر مفتاح الفرج
- الصبي لخالو والبنت لعمتها
- الصدفه خير من ألف ميعاد
- الصديق وقت الضيق
- صديقك اذا ردت تخليه لا تاخد منو ولا تعطيه
- صرت حافظك وعاجنك وخابزك
- صغير وفعله كبير
- الصلاة خير من النوم
- الصلح سيد الأحكام
- صمت دهرا ونطق كفرا
- الصنعه إن ما غنت بتستر
- صوت حية ولا صوت بنية
- صوفتو حمرة
- صيت غنى ولا صيت فقر
- صيف وشتا على سطح واحد ما بيجتمعو

الحرف ض
- ضارب حالو بحجر كبير
- الضحك من غير سبب قلة أدب
- ضحكة عنزة ع باب مسلخ
- ضحكتو رطل
- ضاعت ولقيناها
- الضرب بيعلم الدب الرقص
- ضرب أخماس بأسداس
- ضرب الحبيب زبيب
- ضربة الغشيم بتعور
- الضربة اللي ما بتكسر الضهر بتقويه
- ضربة المعلم بألف ولو شلفها شلف
- الضربة ع الآخرة
- ضربة ع الراس وضربة ع الحافر
- ضربتين ع الراس بيوجعو
- ضربني وبكى سبقني واشتكى
- ضربها أبو الحصين وعشرت
- ضربوه ع بطنو صاح آخ يا ضهري
- الضرة مرة
- ضربها (ضرط) خضير وفضت ع خير
- الضرف المبعوج ما بنتلي
- الضرورة إلها أحكام
- الضيف الشرشوح بياكل وبيروح
- الضيف المنظوم بيشرب قهوة وبيقوم
- ضيعتنا ظغيرة ومنعرف بعضنا


الحرف ط
- طارت عصافير راسو
- الطاسة ضايعه
- الطاقة اللي بيجيك منها الريح سدها واستريح
- طب الجره ع تمها بتطلع البنت لأمها
- طب اللكن ع قفاه بيطلعه الولد لأباه
- طبخة الشراكة شايطه
- الطبخ نفس
- الطبع غلب التطبع
- طبل لي لزمرلك
- طحان ما بيغبر ع كلاس
- الطريق الى قلب الرجل معدته
- طعمي التم بتستحي العين
- طعميتنا من خيرك الله لا يعيزنا لغيرك
- طق عرق الحيا واللي استحو ماتو
- طلطميس ما بيعرف الجمعه من الخميس
- طالع الخمير والفطير
- طلع بسواد الوجه
- طلع فروة مقلوبة
- طلع من المولد بلا حمص
- طلع من بيت الظط مؤذن
- طلع من خرجو
- طمع ابليس بالجنة
- الطمع بالدين
- طنجرة ولقت غطاها
- طهر ابنك بالفاس ولا تعتاز الناس
- طهرت حميد قام فرشخ سعيد
- الطول طول عماره والعقل عقل فاره
- الطول طول نخله والعقل عقل سخله
- طول عمرك يا زبيبة براسك هالعود
- طول عمرنا والشمس ترقعنا
- طولة البال من الرحمن
- الطبل بحرستا والعرس بدوما
- طلع لجحي قرايب
- الطويل بياكل تين والقصير بيموت حزين
- الطيور على أشكالها تقع
الحرف ظ
- ظالم لا تكون ومن الدعي لا تخاف
- ظريفه وعفيفه ولها نفس شريفه
- الظغار بتحميهم الملايكة
- الظفر ما بيطلع من اللحم
- ظل رجال ولا ظل حيطه


الحرف ع
- عاش عيشة العمرين
- عاشر الأجاويد تكسب وتنال وبيشيلو حملك إذا مال
- عاشر الغني بيغنيك وعاشر الجربان بيعديك
- عالوعد ياكمون
- عامل لحالو زوم ومرقة
- عامود حجار ولا هالجار
- العتاب صابون القلوب
- العتب ع النظر
- عجبك عجبك ما عجبك سكوت ولولح بدنبك
- العجله من الشيطان
- عجوز واشتهت أكلت الروس بتموز
- عدو جدك ما بيودك
- عديم ووقع بسلة تين
- عذر أقبح من ذنب
- عرج الجمل من شفته
- عرقو مرقو
- العز للرز والبرغل شنق حالو
- عز مالك عز مالك ،زل مالك زل مالك
- عزرائيل مابدو وسخ يلم بدو ورد يشم
- عزموها تعززت ،لجقوها تدخلت
- عزيمه حلبية
- عزيمه شامية
- عصافير بطنا عم تزقزق
- عصفور بالإيد ولا عشرة ع السجرة
- العصفور بيتفلى والصياد بيتقلى
- العصفور وخيطو
- عصفور كفل زرزور طلعو التنين طيارين
- العصا لمن عصا
- عضة كوساي
- عطاه من الجمل ادنه
- عطو للحمار ورده ليشمها قام أكلها
- عطيناه وجه صار بدو بطانة
- عقب ما طقع ما ينفع الصم
- العقل السليم بالجسم السليم
- العقل زينه
- عقل وتقل
- عقلك براسك بتعرف خلاصك
- عقله بيخض
- عقله ترللي
- عقله جوزتين بخرج
- علقة بدوي بصلاة التراويح
- علك المجنون ملو تمو
- العلم بالراس مو بالكراس
- العلم بالصدور مو بالسطور
- العلم في الصغر كالنقش في الحجر
- علمناه الشحاده سبقنا ع البواب
- على الباغي تدور الدوائر
- على بارد المستريح
- على حجة الورد بيشرب العليق
- على رأي المتل
- على راسو ريشة
- على عينك يا تاجر
- على قد السوق سوق
- على قد بساطك مد رجليك
- على قلبو أحلى من العسل
- على هامان يا فرعون ؟
- علي وعلى أعدائي
- عليق الغارة مالو كاره
- عليه شوارب بيرقصو عقاب
- عم ينفخ النفخة بتطبخ طبخة
- عم يحكي شروي غروي
- عما يرش ع الموت سكر
- عما يسيد ويميد
- عمر الشقي بقي
- العمر الو حق
- العمر بيخلص والشغل ما بيخلص
- العمر لقمة مغمسة بالدم
- عمرا شجرة ما وصلت لربا
- عمرك أطول من عمري
- عمرو البكي ما رجع ميت(غايب)
- عمرو قسام ما دخل الجنة
- عملتو صندا بندا
- عند نقش كفوفهم ما حدا بيشوفهم وعند بلاويهم قومو يا أهاليهم
- عملو بقرة حلابه
- عملوها الصغار وقعو فيها الكبار
- العمى عند الإمتحان يكرم المرء أو يهان
- عند البطون بتضيع العقول
- عند العزايم أنطون نايم وعند جلي الصحون وينك يا أنطون
- عند العقدة ضرط النجار
- عند الكبرا جبه حمرا
- عندك عيش وعندي عيش الطمع ليش
- العنزة الجربانة ما بتشرب إلا من راس النبع
- العنزة لعبت بفلسها ما ضرت غير نفسها
- عنزة ولو طارت
- العود ما بيحن غير ع قشرو
- عيار الشبعان اربعين لقمة
- عيب ع اللي بيعمل العيب
- العيب من أهل العيب ما هو عيب
- عيش كتير بتشوف كتير
- عيش يا كديش لينبت الحشيش
- العين بصيره والإيد قصيره
- عين خير
- العين ما بتعلا عن الحاجب
- العين ما بتقاوم مخرز
- العين مغرفة الكلام
- عينه بتبخش الحجر
- عيني فيه وتفو عليه
- عيونه بتغزل غزل

الحرف غ
- غاب القط إلعب يا فار
- غاب السبع قام أبو الحصنان يتصيد
- الغالي تمنو فيه
- الغالي هو الرخيص
- غالي وطلب رخيص
- الغاليه للغالي
- الغايب حجته معه
- غب غب جمال وقوم قبل الرجال
- الغربة بتعلم
- الغربة كربة
- الغريب أعمى
- الغريب أديب
- الغريق بيتعلق بحبال العرمط
- الغزالة بتغزل برجل حمار
- الغلط مردود
- غلطة الشاطر بألف
- غنيه والنفس دنيه
- غيب شموس وخود فلوس
- غيبة المستحيه من ع بكرا لعشية
- الغيرة بتقتل صاحبها
- غيض من فيض
- الغيم بيسابق الخيال


الحرف ف
- الفاجر أكل مال التاجر
- فاضي مشغول متل أم العروس
- فاكهة الدار بتطول العمار
- فتح عينو ع معلقة دهب
- فخار يكسر بعضو
- فرحتو ما وصلت لقرعتو
- فرخ البط عوام
- فردة ما إلها أخت
- الفرس الأصيله ما بيعيبها جلالها
- الفرس من الفارس
- الفرفور ذنبو مغفور
- فرق من الارض للسما
- فش غليلو
- الفص ع المرتكي هين
- فص ملح وداب
- فضت براس عليوي
- فضت على خير
- الفضله للفضيل
- الفقر بيعمي القلب
- الفقر ما هو عيب
- الفقير بيعضو الكلب ولو راكب ع الجمل
- فقير وزبو كبير
- فكرنا الباشا باشا طلع الباشا زلمي
- الفلاح إذا تمدن متل التور إذا تكدن
- فلاحة الوحل محل
- فلتانه براغيه
- فلوس وناموس ما بيصير
- فوق حقه دقه


الحرف ق
- قاتلني وخلي للصلح مطرح
- قاضي الأولاد شنق حالو
- قاعد بحضنا وبينتف بدقنا
- قاعد متل قفة الهم
- قالو حبني وخود جحش قالو المحبة ما بتصير دحش
- قالو صباح الخير يا أقرع قالو هادا أول باب من النقار
- قالو ما مت ! ما شفت مين مات ؟
- قال يا مرا مين علاكي ؟جوزك وبيت حماكي
- القالب غالب
- قامت قيامتو
- قالو للبغل مين أبوك ؟قال الحصان خالي
- قالو للبغل مين أبوك ؟قال الفرس أمي
- قعد ينط ما يحط
- قالو للحرامي احلف قال إجاني الفرج
- قالو للجمل صفر قال لا شفتي مزمومة ولا أصابعي مضمومة
- قالو للديك صيح قال كل شي بوقتو منيح
- قالو للرزيل صير آدمي قالبيصير إلي اسمين
- قالو للقطط خراكم منافع صارو يخرو ويطمرو
- قالو يا فرعون مين فرعنك قال ما حدا ردني
- قالو يا حواجبو يا عيونو قال ع المغسل بيبان
- قام الدب ليرقص طمس بصحن الحمص
- قام الدب ليرقص قتل سبع تمن تنفس
- قبل ما تفصل قيس
- قتلني وبكى سبقني واشتكى
- قدها قد الفارة وصوتها ملا الحارة
- قدها وقدود
- القرد بعين أمه غزال
- القرش ما بيغطي شرش
- القرع لما استوى قال للخيار يا لوبي
- القرعة بتتباها بشعر بنت أختها
- القط ما بيحب غير خناقو
- قط ما بيهرب من عرس
- قطاع راس القط من أول ليلة
- قطاع العرق وسيح دمو
- قطع الأعناق ولا قطع الأرزاق
- قعود برا ولا تقعد جنب الجرة
- قفة هم
- القلب بيحن
- قلبي على ولدي وقلب ولدي ع الحجر
- قلبي من الحامض لاوي
- قلعناه من الباب رجع من الشباك
- القلوب عند بعضها
- القناعة كنز لا يفنى
- قهوتكن مشروبي
- قولو متل بولو
- قلي لقلك
- القوي بياكل الضعيف


الحرف ك
- كب ع قفاه مي باردة
- كبرت يا أنفي وصرت تمخط
- الكبر لألله
- كبرها بتكبر وصغرها بتصغر
- كبير القوم خادمهم
- كتر الدق بيفك اللحام
- كتر الروحة والجي على أمك وأبوك بيكرهوك
- كتر الشد بيرخي
- كتر السمن ع البدوي صار ياكل ويمرغ ايداي
- كتر المرعى بيعمي قلب الدبه
- كتر الوقعات بتعلم المشي
- كترة الترحيب بتجيب ضيف الثقيل
- كترة الضحك بتقلل الهيبة
- كترتهم متل قلتهم
- كتير الحركة قليل البركة
- كتير الكارات قليل البارات
- الكحل أخير من العمى
- الكذب المسطر أحسن من الصدق المتعتر
- الكذب ع الميت مو ع الطيب
- الكرم أكرم من صاحبه
- كرمال عين تكرم مرج عيون
- كريم من كيس غيرو
- كسرنا الدف وبطلنا الغني
- كساب وهاب
- كسر ايدو ودار يشحد عليها
- كش برا وبعيد
- كفى ووفى
- كل أتره شكل
- كل إناء ينضح بما فيه
- كل واحد همو على قدو
- كل الكلاب أحسن من حمور
- كل تأخير خير
- كل دار وإلها بلوعه
- كل دست وإلو مغرفة
- كل دقن وإلها مشط
- كل الدروب ع الطاحون
- كل ديك على مزبلتو صياح
- كل ذي عاهة جبار
- كل ساعه وإلها ملايكتا
- كل سدة بردة
- كل شارب إلو مقص
- كل شي بتمنو
- كل شي إلو شي
- كل شي إذا زاد عن حدو انقلب ضدو
- كل شي بأوانو حلو
- كل شي بأولو صعب
- كل شي قسمة ونصيب
- كل شي يبدأ صغير وبيكبر إلا المصيبة تبدأ كبيرة وتصغر
- كل شيخ إلو طريقة
- كل طلعة وراها نزلة
- كل طلقة براحة
- كل طويل لا يخلو من الهبل وكل قصير لا يخلو من الفتن
- كل عرس إلو قرص
- كل عقده وإلها حلال
- كل عنزة معلقة بكرعوبها
- كل عيش إلو كريش
- كل فولة وإلها كيال
- كل ما جعت بتاكل طيب
- كل ما دق الكوز بالجرة
- كل ما شابت طابت
- كل ممنوع مرغوب
- كل مداس إلو لباس
- كل موته وإلها سبب
- كل مين بيقلع شوكه بإيدو
- كل مين بيغني ع ليلو
- كل مين عقله براسو بيعرف خلاصو
- كل مين عقله عاجبو
- كل مين همه على قده
- كل واحد بيجر اللحاف لصوبو
- كل واحد بيشكي من جرحو
- كل واحد بيعمل بأصلو
- كل واحد بينذكر بأعمالو
- كل واحد رضيان بعقلو
- كل واحد ذنبه على جنبه
- كل واحد مخطتو على تمو حلوة
- كل واحد ريقه بتمه حلو
- كل واحد بيعاشر مرتو بمعرفتو
- الكلام أخذ وعطى
- كلام الأسى ما بينتسى
- كلام الليل بيمحيه النهار
- كلامو من قفا الدست
- كلب الأمير أمير
- كلب خلف جرو طلع أنجس من أباه
- كلب فلتان أحسن من سبع مربوط
- الكلب ما بيعض أخوه
- كلمة الحق مره
- كلمة الحق ما بتزعل
- الكلمة اللي ما بتنسمع يا خسارة قايلها
- كلمة بتاخدو وكلمة بتجيبو
- كلمة ورد غطاها
- كلمة وقلناها شو صار ؟
- كلمة يا ريت ما عمرت بيت
- كلمتو ما بتصير تنتين
- كلمتو ما بتنزل ع الأرض
- كلمتين نضاف أحسن من جريده وسخة
- كلمتين ورد غطاهم
- كلنا بالهوى سوى
- كلو عند العرب صابون
- كما تراني يا جميل أراك
- كمل النقل بالزعرور
- كن مع الله ولا تبالي
- الكنه إن كننتها بتكن وإن جننتها بتجن
- الكثرة بتغلب الشجاعة
- كنس بيتك ما بتعرف مين يدوسو وغسل وجهك ما بتعرف مين يبوسو
- كول أكل الجمال وقوم قبل الرجال
- كول التفاحة بقشرها لوكانت بمصرية وكول الخيارة وقشرها لوكانت بمية
- كول بكير ونام بكير وشوف الصحة كيف بتصير
- كومة حجار ولا هالجار
- كويس ورخيص وإبن ناس
الحرف ل

- لا بيصد ولا بيرد
- لا بيرحمو ولا بيخلي رحمة الله تنزل عليه
- لا بيعض ولا بيخرمش
- لا تتخبى ورا أصبعك
- لا تقص دنب حمارك قدام تنين هادا بيقول طويل وهادا بيقول قصير
- لا معلقا ولا مطلقا
- لا من تمو ولا من كمو
- لا بتنحلب ولا بتنجلب
- لا تأمن للملوك ولو ولوك ولا للنساء ولو عبدوك
- لا تاخد أرملة وخدها مشموم شو ما عملت معها بتقول مو متل المرحوم
- لا تاخد الرفسة الماكنة إلا من الحمار الضعيف
- لا تاخد صاحب إلا من بعد قتله
- لا تبيع المي بحارة السقايين
- لا تبيع رخيص ولا توصي حريص
- لا تجر حبل قدام بيت مشنوق
- لا تحركو بتطلع ريحتو
- لا تحط بالرز بصل
- لا تشكيلي ببكيلك
- لا تعاشر صاحب زعامة ولا كبير عمامة
- لا تقول فول ليصير بالمكيول
- لا تقول للمغني غني ولا للراقوص ارقص
- لا تكن قاسيا فتكسر ولا لينا فتعصر
- لا تهرف بما لا تعرف
- لاحقو ع الدعسة
- لا طير يطير ولا وحش يسير
- لا عين تشوف ولا قلب يحزن
- لا عين شافت ولا أذن سمعت
- لاقيلي ولا تطعميني
- لا منام بين القبور ولا منشوف منامات وحشة
- لا ناقة لي فيها ولا جمل
- لا هابوب ولا دابوب
- لا يموت الديب ولا يفنى الغنم
- لبس المأشي بتصير ست النسا
- لبكرا فرج
- لبس العود بيجود
- لحاق الكذاب للباب
- لحاق البوم بيدلك ع الخراب
- لزقه أفرنجية
- لزقة ميدع
- لسانك حصانك ان صنتو صانك وان خنتو خانك
- لسانو متل المبرد
- لسانو آكلو القط
- لسى الخير لقدام
- لسى ما فقست عنو البيضة
- لعب الفار بعبو
- اللقمة اللي بتمو مو إلو
- الله بالعين ما نشاف بالعقل نعرف
- الله بيبعت الجوز للي مالو سنان
- الله بيبعت الحلق للي مالو ودان
- الله بيستر ع الي بيستر
- الله جمع ووفق
- الله حط سرو بأضعف خلقو
- الله خلق الدنيا بست أيام
- الله لا يشيل عن قلبو الشدة
- الله لا يعيز حدا لحدا
- الله ما بيبلي إلا بيعين
- الله ما عندو حجار يراجم فيها
- الله يتحنن
- الله يعطينا خير ها الضحك
- لو تعرف منافع الجرجير لزرعتو تحت السرير
- لو دقو لحمي ولحمو بالجرن بتتطاير
- لو كنت طبيب لطببت حالي
- لو فيه خير ما رماه الطير
- لولا الكاسورة ما عمرت الفاخورة
- اللي إلو عمر ما بتقتلو شدة
- اللي أوله شرط آخره سلامة
- اللي إيدو بالمي مو متل الإيدو بالنار
- اللي بدو يكذب يبعد شهودو
- اللي ببلاش ما بينحاش
- اللي ببيت أهله على مهله
- اللي بيتاجر بالسم بيلحس منو
- اللي بتجيبو السمرا ما بيكفيها بودرة وحمرا
- اللي بتحطو بالدست بيطلع بالمغرفة
- اللي بتزرعو بتحصدو
- اللي بتعرف حق دمو قتلو
- اللي بتمو لسان ما بيضيع
- اللي بجنبو مسلة بتنخزو
- اللي بيحب النبي يخلي
- اللي بيخاف من العفريت بيطلعلو بالمنام
- اللي بدو يسكر ما بدو يعد قداح
- اللي بيدق الباب بيسمع الجواب
- اللي بدك تحيرو خيرو
- اللي بيدل ع الخير متل اللي بيعملو
- اللي بدو يلاعب القط بدو يلقى خراميشو
- اللي بيدور ع ربو بيلاقيه
- اللي بيشوف مصيبة غيرو بتهون عليه مصيبتو
- اللي بيكبر لقمته بيغص
- اللي بياخد أمي بسميه عمي
- اللي بياخد مالك خود روحو
- اللي بياخد من غير ملتو بيموت بعلته
- اللي بياكل العصي مو متل اللي بيعدها
- اللي بياكل على درسو بينفع نفسه
- اللي بياكل من خبز السلطان بيضرب بسيفو
- اللي بيتو من ازاز ما بيضرب الناس بالحجار
- اللي بيجي من الله يا حيالله
- اللي بيستحي من مرتو ما بيجيه ولاد
- اللي بيطلع بايدو يعملو يعملو
- اللي بينشرى ما بينشهى
- اللي بيوقع من السما بتسلقاه الأرض
- اللي حسبك بسعو ما ظلمك
- اللي حسبناه لقيناه
- اللي خلف ما مات
- اللي ضرب ضرب واللي هرب هرب
- اللي طالع الحمار ع السطح بينزلو
- اللي على بالو ما يحرم حالو
- اللي عجبو عجبو واللي ما عجبو يقرفص ويلولح بدنبو
- اللي ما بيجي معك تعا معو
- اللي ما بيحسب ما بيسلم
- اللي ما بيعرفك بيجهلك
- اللي مضى مضى
- اللي من إيدو الله يزيدو
- ليجي الصبي منصلي ع النبي


الحرف م
- ما باس تمها غير أمها
- ما بتعرف خيرو لتجرب غيرو
- ما بيحس بالوجع غير صاحبه
- ما بيحك جلدك غير ضفرك
- ما بيحن ع العود غير اشرو
- ما بيدوم غير وجهه الكريم
- ما بيشخ على اصبع مجروح
- ما بيصح إلا الصحيح
- ما بضيع حق ورا مطالب
- ما بعد الشدة( الضيق) إلا الفرج
- ما بيعيب الرجال إلا جيبو
- ما بفوتو فايت ولا طبخ بايت
- ما بقي بالكرم غير الحطب
- ما بقي شي من العمر يحرز التوبة
- ما بيمرر السمسمة
- ما بيجي من الناس غير وجع الراس
- ما بيخسر غير اللي بيموت
- ما بيضحك لرغيف السخن
- ما بيعجبو العجب ولا الصيام برجب
- ما بيعرف تلت التلاته كام
- ما بيعرف كوعو من بوعو
- ما بيعرف الله وين حاطو
- ما بيغلى عليك غالي
- ما بيقطع الراس إلا اللي ركبو
- ما بينفع لا للخل ولا للخردل
- ما حدا بيقول عن زيته عكر
- ما حدا فوق راسو خيمة
- ما خلى حيلتي حيلي
- ما صرلو بالقصر غير من مبارح العصر
- ما عاد في عمر بيستاهل التوبة
- ما عندو كبير غير الجمل
- ما في الدومري
- ما في بالميدان غير حديدان
- ما في شجرة وصلت لربها
- مافي شجرة ما هزها الريح
- ما في يا أمي ارحميني
- ما كل مرة بتسلم الجرة
- مانو فهمان راسو من برناسو
- ما ورا لا أحمد ولا محمد
- ما باليد حيلة
- ماشي على بيض
- الماعون الكبير بيوسع الماعون الصغير
- مال الخسيس بيروح معيس
- المال من برا واضرب يا خرا
- المال بيجر مال والقمل بيجر صيبان
- متل الضراط ع البلاط
- متل الطبل منفوخ ع الفاضي
- متل العرمط ما بيحل وما بيربط
- متل القط بسبع رواح
- متل القملة المفروكة
- متل اللي بيشتري سمك بمي
- متل اللي مضيع جحش خالتو
- متل المنشار طالع واكل نازل واكل
- متل تجارة جحا بالبيض
- متل دكر النحل
- متل شغل العميان قبيض بقبيض
- متل شق اللفت
- متل قفة الهم
- متل ما بتفصل منلبس
- متلو متايل
- مخول
- مزمار الحي لا يطرب
- مرة البتخسر بتعلم
- المرا ضلع قاصر
- المرا بنص عقل
- مسبع الكارات قليل البارات
- مربيتو كل شبر بندر
- مشتراة العبد ولا تربايتو
- مشتهية ومستحية
- مصفاية ما بيعيبها بخش
- مضروبين بحجر كبيرة
- مطبل بالدنيا مزمر بالآخرة
- مطرح ما بتحط راسك حط رجليك
- مطرح ما بترزق إلزق
- مطرح ما خري شنقوه
- مطرح ما يسري يمري
- مقطع موصل
- مكبر زبو بشراطيط
- المكتوب ما منو مهروب
- المكتوب مبين من عنوانه
- مكسور لا تاكل وصحيح لا تقسم وكول لتشبع
- من أمنك لا تخونو ولو كنت خوان
- من أول الدرب ولا من أخره
- من الباب للطاقة
- من الباب للمحراب
- من العب للجيب
- من برا رخام ومن جوا سخام
- من برا هالله هالله ومن جوا يعلم الله
- من بيت شقاع لبيت رقاع
- من تحت الدلف لتحت المزراب
- من تمك أحلى يا كحلى
- من تمك لبواب السما
- من دهنو سقيلو
- من ساواك بنفسه ما ظلمك
- من شاف مصايب الناس هانت عليه مصيبته
- من شاف حبابه نسي صحابه
- من شب على شي شاب عليه
- منشفة البدو لحاهم
- من صبر ظفر ومن لج كفر
- من تأنى نال ما تمنى
- من طلب الزود وقع بالنقص
- من عجبو الكري بكر
- من عرف حدو وقف عندو
- من غير دف عم يرقص
- من غير وحام مصفرة
- من قلة الخيل شدو عالكلاب سروج
- من كل وادي عصاي
- من معرفتو بالصحابة ترضى على عنتر
- من وهج القفص دق ورقص
- منمشي الحيط الحيط ومنقول يا رب الستره
- المنيحة ما بدها مشاورة
- الموت كاس داير ع كل الناس
- الموت مالو شماته
- موت الفقير وتعريص الغني ما حدا بيدرا فيهم
- موجة بتاخدو وموجة بتجيبو
- المي بتكذب الغطاس
- المي سارحة من تحتو ومانو دريان
- مي وانكبت
- الميت ما بيجوز عليه غير الرحمة
- ميتو ما بيموت
- مين بيصرلو دلال وما بيتدلل
- مين شايف كحلتك يا مرت الأعمى



الحرف ن
- النار ولا العار
- نارك ولا جنة هلي
- ناس بتاكل جاج وناس بتوقع بالسياج
- الناس بلا الناس
- الناس ما بتستغني عن بعضها
- الناس مخباية بتيابها
- الناس مقامات
- نافش حالو متل ديك المزبلة
- نبق متل حمصة الكي
- نجوم السما أقرب لك
- النحس راكبو
- نص الألف خمسمية
- نص الكلام مالو جواب
- النصيحة صارت فضيحة
- نفسو حامضه
- النفس أمارة بالسوء
- النفس خضرا
- نقص الدست بيتنجانة
- نقعها وشراب ميتها
- نوم الظالم عباده
- النوم سلطان
- نومة أهل الكهف
- نيال اللي وفق راسين بالحلال
- نيال المتهوم عند ربه بري



الحرف ه
- هادا وش الضيف
- هالخد متعود ع اللطم
- هالشبل من هالأسد
- هالضرب مو ضرب صحاب
- هالكف ما دري بهالكف
- هاي سمعه جديده
- الهريبة تلتين المراجل
- هلأزمر بنيك
- الهم بيقتل صاحبو
- هم مالو هم اشترالو
- هون حطنا الجمال
- هون حفرنا وهون طمرنا
- هون مربط الفرس
- هونها بتهون صعبها بتصعب
- هوي اللي جاب الدب لكرمو
- هين فلوسك ولا تهين نفوسك



الحرف و
- وافق شن طبقه
- واقف على دقرا
- وجها متل الصلاة على النبي
- وجهك ولا ضو القمر
- وجهو بيكب صحن اللبن
- وجهو بيقطع الرزق
- وجهو عم ينقط سم
- وجهو ما بيضحك لرغيف السخن
- وردة بتخلف شوكة
- وراك والزمن طويل
- الوعاء الكبير بيساع الصغير
- وعد الحر دين
- وقت اللي بيجي الصبي منصلي على النبي
- الوقت كالسيف إن لم تقطعه قطعك
- وقع الفاس بالراس
- وقعت ولا الهوى رماك
- ولاد الحرام ما خلو لولاد الحلال شي
- الولد اللي ما بيبكي ما بترضعو أمو
- الولد اللي ما من ضهرك كل ما جن فرحلو
- الولد اللي بدو يعيش بينعرف من خراه
- الولد سر أبيه
- الولد ولد ولو حكم بلد
- وين الدنيا ووين أهلها


الحرف ي

- يا آخد القرد على مالو بيروح المال وبيبقى القرد على حالو
- يا أرض اشتدي ما حدا أدي
- يا سراجين وشمعه يا ع العتم جمعه
- يا شيوخ رجعو شباب قالو دعوة الما بتستجاب
- يا صبر أيوب
- يا طالب الدبس من طيز النمس
- يا كحلى من إيدك أحلى
- يا ما بالحبس مظاليم
- يا ما تحت السوهي دواهي
- يا مأمني للرجال يا مأمني للمي بالغربال
- يا متلنا تعو لعنا
- يا مستعجل وقف تقلك
- يا منطخو يا منكسر مخو
- يا أرض حفظي ما عليكي
- يا جبل ما يهزك ريح
- يا خبر اليوم بمصاري بكرا بيصير ببلاش
- يا داخل بين البصلة وقشرتها ما بينوبك منها إلا ريحتها
- يا رايح كتر ملايح
- يا روح ما بعدك روح
- يا شاري الهم من قلب صاحبو
- يا صابت يا خابت
- يا غافل إلك الله
- يا قاتل يا مقتول
- يا ماشي ع رجليك ما بتعرف شو مقدر عليك
- يا مسترخص اللحم عند المرق تندم
- يخلق من الشبه أربعين
- يرحم البطن اللي حملك
- يصطفلو
- يطعمك الحج والناس راجعه
- يلعب بالأربعه وراسو الخامس
- يلي مابيحضر عنزتو بتجيب جدي
- يلي بيعرف بيعرف واللي ما بيعرف بيقول كف عدس
]
الرجوع الى أعلى الصفحة اذهب الى الأسفل
ابن حمص
 
 
avatar

عدد المساهمات : 83
النقاط : 195
الشُّهرة : 2
تاريخ التسجيل : 19/02/2011

مُساهمةموضوع: رد من ابن حمص   السبت 19 فبراير 2011, 4:02 am

شيء مميز ورائع يا محمد جميل ان تقدم هذا العمل بصورة مميزة ورائعة بوركت جهودك والله يعطيك الف الف عافية فقد اخذ ها العمل منك جهدا كبيرااااا برابو اقولها بحق لك تحياتي واحترامي
ابو تمام
الرجوع الى أعلى الصفحة اذهب الى الأسفل
أبو عيدو
 
 
avatar

عدد المساهمات : 47
النقاط : 123
الشُّهرة : 1
تاريخ التسجيل : 13/02/2011
العمر : 29
المكان : سوريا
الجنس : ذكر

مُساهمةموضوع: شكرا   السبت 19 فبراير 2011, 9:45 am

كل الشكر لك أبو تمام على هذه الكلمات التي كتبتها وأنا جدا مشــــــــــــكووووووور
الرجوع الى أعلى الصفحة اذهب الى الأسفل
 
الأمثال في حي دير بعلبة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات دير بعلبة :: المنتديات العامة :: المنتدى المنوع-
انتقل الى: